اخد الشر و راح

سألنى واحد صاحبى هو انت ناصرى  ؟؟؟؟؟؟

بصراحه فكرت شويه يمكن تطلع تهمه ولا حاجه و صحبى ده يبقى من ضمن السته اللى بيراقبوا كل بنى آدم فى البلد دلوقتى و يسلمنى، 

قولتله لا مش ناصرى بس بحب جمال عبد الناصر

سألنى سؤال سخيف  طيب بتحب الريس حسنى  ؟؟؟؟؟؟؟؟؟؟؟؟؟؟

ابتديت فعلا اشك فيه و حسيت انه بيحاول يوقعنى فى الغلط

قولتله طبعا ده ابو الشعب هو احنا لينا غيره الريس اطال الله عمره 

بصراحه خوفت ادعى على اللى بيكرهوه  لان اى واحد فى الدنيا فى حد بيكرهه  اكيد فى كتير من اعداء النجاح بيدعوا عليه  و اكيد فى كتير برضو بيكرهونى  علشان كداب

قالى بتحب ايه فى الريس تأكدت انه عميل و عميل  رخم كمان

فكرت شويه كتير ايه اللى ممكن اقوله  لقيتنى بقول

اول طلعه جويه اه اول طلعه جويه  رفعت رايه الحريه

راح قايلى بس نصر اكتوبر ده اللى ليه الفضل فيه بعد ربنا هو السادات ،

و بعدييييييييين انا مش فهمك ياض انت معنا ولا مع الناس التانيين

قولتله السادات خطط و الريس ضرب

قالى ضرب ايه بس ماهو الجيش كله كان بيضرب هو ضرب لوحده ؟

،و بعدين فى ابن الهرمه ده انا ما اعرفهوش من كتير و احنا على القهوه يعنى لو مش عميل يبقى ها نتحبس انا و هو 

لقيتنى بقوله:

يا ابنى اللى مالوش خير فى الريس مالوش خير فى مصر  

حسيت انى لو سكت هيوقعنى فى الغلط روحت سائله انت عندك كام سنه؟ قالى 30 . قولتله يعنى وعيت على الدنيا لقيت الريس، قالى اه

قولتله يبقى اللى تعرفه احسن من اللى ما تعرفهوش

ثم انت ليه بتتكلم من غير نفس كده على الزعيم القائد اطال الله عمره؟

و ما اخدتش بالى و انا بتكلم ان فى واحد ورانا رامى ودنه

المرحوم رد عليا قالى انت مش شايف الغلا و الاسعار و الدنيا زحمه و الحاله كرب

قولتله يعنى عايز الريس ينزل يشتغل بدالك ولا ينظملك اشاره المرور هو هيعمل ايه ولا ايه مش كفايه المشكله الفلسطينيه اللى جابتله المراره

والله احنا شعب ما بيحمدش ربنا ابدا 

و المفاجأه الكبيره انو اتهمنى انى عميل للحكومه و انا والله  اساسا موظف فى القطاع الخاص

المهم زعل و قام و ماشوفتهوش تانى بعدها

 الله يرحمو و يحسن اليه مش لاقيينله اثر لحد دلوقتى ، مانعرفش راح فين

، اخد الشر و راح.

البردعى

صح كده نرشح البردعى زى ما معظم الناس كانت عايزة ترشح ايمن نور و ليلة الانتخابات تنتشر إشاعه تقول أن البردعى كان بيكلم البيت الأبيض امبارح و ليقسم يمين الولاء في التليفون كمان تثور عليه الناس و تقول اللى نعرفه أحسن من اللى ما نعرفهوش يقوم و نقع فى جمال تفضل ريما على عادتها القديمة و ما يحصلش اى تغير فى اى حاجه نصبر تانى على الجار السو لحد ما يرحل و لان زى المثل القديم ما بيقول مكروه الدار طويل العمر فهيفضل الجار السو على قلبنا لحد ما كلنا نموت من المر اللى بنشوفه و ياخدوا فرصتهم فى البيع بجد و حته للإيجار حته و  يبيعوا التانية .

اللعبه سهله التضليل و الناس من تعبها و قرفها بيتعلقوا بأى حاجه اى قشايه زى الغرقان بالضبط طيب تعالوا نحسبها ايه اللى ممكن يتقال على راجل محترم زى الدكتور البردعى اللى فى حملات شعبيه لانتخابه فى كل محافظات مصر

·                   عمل ايه لمصر

·                   ولاء الراجل ده مش لمصر

·                   الراجل ده جاى بتوصيه من امريكا

و حجات تانية كتير عيب شعبنا انه يتلهى فى اى حاجه جديدة بسرعة ، من سنتين تقريبا كان فيه حمله مشابهه لحمله البردعى لانتخاب عمرو موسى و ده برضه راجل لا غبار عليه بس لما يترشح عمرو موسى و البردعى و جمال ها يحصل تشتيت للأصوات الانتخابية و هيبقى سهل  الغش فى الانتخابات و الناس مش ها تبقى عارفه هى عايزة مين بس هتتشتت الأصوات بسهوله و يدخل الحزب الحاكم ينجح اللى هو عايزه و يبقوا برضو فى الأخر عملوا اللى هما عايزينه يعنى يبقى كأنك يا ابو زيد ما غزيت و نرجع نندب حظنا و نقول يا ريت اللى جرا ما كان طيب نعمل ايه نستسلم ولا نشتت أصوتنا ولا نرشح جمال و نخلص و يمكن يطلع ابن حلال و يصلح فى البلد لو حس أننا احنا اللى عايزينه و تبقى بجميله !!!!!!!!!

انا عن نفسي ورا عمرو موسى و أتمنى انه يكون بيحبها زى ما أهلها ما بيحبوه أتمنى انه يطلع زى جمال عبد الناصر اللى عمل كتير وكان شغله الشاغل رفعت مصر و الوحدة العربية أو يطلع زى السادات يحررنا من الاستعمار بس المره دى استعمار اقتصادي أصعب من الأول أتمنى انه يحب مصر بجد و ساعتها زى ايام عبد الناصر و السادات هيلاقى وراه الشعب كله جيش يسهر على رفع اسم مصر فى السماء أتمنى انه زى ما جاب حقوق مصرين فى بلاد حفاه الأقدام انه يجيب حقوق المصرين فى مصر يوصلهم الدعم ، يرجع للمواطن المصرى كرامته المهدورة ، يحسن دخل الناس و يحارب الفساد ، فى ناس كتير ممكن تقعد على كرسي الرياسة و تدى البلد و تحفظ  كرامة المواطن المصرى المهم يبقى بيحب مصر و يعمل اللى ربنا يقدره عليه عشانها .

من طُلِبَ إلى شئٍ أعين عليه و من طلب شيئاً وكّل اليه .

الله يرحمك يا شعراوى.  

قطعوا الكهربا

طيب أنا موافق أن المظاهرات ما تطلعش بره الجامعه ولا بره الجوامع لأن فيه ناس بتندس بين الناس و بتخرب في البلد اللي هي أساسا مش محتاجة  خراب .المظاهرات ما هى الا تنفيس عن الغضب و الثورة الداخليه احساس بنطلعه فى الهتاف مجرد تنفيس عن الغضب و فى نفس الوقت نوع من الاعتراض على الاوضاع اللى مش عاجبه الناس .

لكن لما كمان نحبس صوت الناس و نفرج الاجانب علينا و احنا بنحبس صوت الناس يبقى ليهم حق يقولوا ان احنا معندناش حريه ليه يتقطع الكهربه علشان الهتاف مايوصلش بره الجامع الازهر و الحجه السياحه .

فى كل دول العالم المظاهره بتتبلغ بيها الحكومه و بتطلع متأمنه من الحكومه و ممنوع لمس اى متظاهر الا فى حاله الشغب ازاى نبقى متحضرين و لينا رأى و احنا صوتنا محبوس رد فعل طبيعى لمعظم الناس انهم اساسا ماعندهمش بطاقه انتخابيه ولا بينتخبو اى حد فى اى حته و مقطعين السياسه بدل ما الواحد دمه يتحرق يقاطع السياسه باللى فيها لا انتخبات ولا مظاهرات ولا رأى اساسا ليه علشان صوته مابيوصلش و يتلهى فى الشغل و لقمه العيش و الجرى ورا القرش و يفضل يهرى و ينكت فى نفسه يلعن فى الحكومه و اللى جابوا الحكومه و البلد و يدور على اى حته يهج و يسيب البلد طيب و بعدين الناس اللى لسه فيها نفس نقطع نفسهم ولا نستغل حماسهم فى كشف الاخطاء اللى فى البلد ولا  نكتم صوتهم اساسا ولا نديهم فرصه حتى يخبطوا دماغهم فى الحيط لو اى سايح فى العالم شاف مظاهره متأمنه هيعرف اننا بلد متحضر لكن لما يشوف كميه التأمين اللى كانت موجوده بره باب المسجد الازهر مناره الاسلام فى العالم الاسلامى اكيد هيعرف ان احنا عايشين فى بلد دكتاتور بيكتم صوت الناس و بيرهبهم يا ناس لو قوات الامن اللى كانت عند مسجد الازهر و الحسين و جامعه القاهره و جامعه عين شمس علشان يكتموا صوت شوية طلبة راحوا فلسطين كان زمانهم ابادوا اليهود مش طلعوهم من المسجد الاقصى و عرفوا الاعلام ان فيه مسلمين غيورين على دينهم و على أولى القبلتين حسبى الله و نعم الوكيل حد يقولى ايه اللى ممكن يحصل لو الناس قالت رأيها اقول انا هنتنقل من تصنيف عالم تالت الى عالم اول حسبيى الله و نعم الوكيل فى اللى عايز بلدنا تفضل عالم تالت و فى اللى اعتقل الناس فى نفسها و كتم صوتهم حسبيى الله و نعم الوكيل .

مصر بنت التيييييييييييييييييييييييييييييييييييييييييييييييييييييت

سبحان الله يا اخى تشتمها ما تشتمها لو حد جاب سرتها بكلمه تهبش فيه زى القطه اللى بدافع عن عيلها طيب ليه هو انا علشان زعلان من امى اشتمها طيب فرضا امى بيعانى ها اتبرا منها هتفضل امى و هيفضل حبى ليها فطرى و هفضل عارف من جوه قلبى ان بعها ليه غصب عنها لحظه ضعف و مسيرها تصلح غلطها و تراضينى اصلها امى يا امى بقى تشوف لها عيال تنيا تتسند عليهم


وصلنا لمربط الفرس ولاد تتسند عليهم هو ليه انا و اللى حوليا كل واحد فينا بيرمى على غيره يعنى انا با اطلب من الحكومه و انت بتطلب من الحكومه و ده بيطلب و ده بيطلب و الكرثه اننا عرفين ان الحكومه حيطه ميله لا هتصد ولا ترد فين ولادها اللى ها تتسند عليهم كنا زمان نسمع عن واحد الله يرحمو و يبشبش الطوبه اللى تحت راسو مكنتش امو بس حبها اوى اسمه محمد على عمل من بتاع 120 سنه اختراع اسمه الثوره الصناعيه و كمل عليه ابنها اللى من صلبها جمال عبد الناصر و برضو كان فى ناس مسكه فى ديل الحكومه و الحكومه هى بابا ومصر هى ماما و ماما طلع عنيها من بابا كفر سيئتها يجو الولاد بدل ما يكبرو و يبقو رجاله و يعملو حاجه يشتمو ماما طيب ماما ملها و مال اللى بابا بيعملو بابا مش فارق معاه احدف ماما بالطوب هى الست هتعمل ايه ولا ايه ثم الشيخ سيد الله يرحمو لما قال (قوم يا مصرى مصر ديما بتنديك خد بنصرى نصرى دين واجب عليك)كان بيكلم ولادها ولا بيكلم حد من بره كل واحد يطلب من ماما و ماما عليها تحرك العصايه السحريه و تنفز ازاى يعنى قولو لبابا يرحمنا شويه و يرفع ايدو عن ماما و هى تنعنشنا والله ما فى احلا منها و مش بشهاده اهلها على فكره بشهاده كل شعوب العالم بشهاده الى هيموت و يشم ريحه تربها بحكم شغلى قبلت ناس من جميع الجنسيات اكتر حاجه سمعتها منهم بيلحظوها فينا الاحساس بالامان سبحان الله تخيل الامان يعنى مثلا لو انت على الطريق السريع القاهره اسكندريه مثلا و العربيه عطلت اكيد هتلاقى حد يقف يعرض مسعده من غير ما تشاور اصلا فى اوربا كلها استحاااااااااااااااااااااااااله حد يعبرك فى الشارع لو بتتسرق بالاكراه فى عز النهار. ماما يعنى الامان الباقى على ولادها ادتكم امان خليكو رجاله و اعملو حاجه قولو لبابا عيب .