و انا صغير كنت باسمع من ابويا كلمه عمر افتراضى كتير كل ما اكسر حاجه قبل ما امى تيجى بالمنفضه كان يقولى العمر الافتراضى بتاعها كده معناها بالبلدى سماح النوبه يا ام محمد فأمى بالتالى بتعديها و هى كمان ربنا يديها الصحه طول عمرها ست طيبه المهم ده تعريف العمر الافتراضى اللى اتعلمته او فهمته من ابويا و انا صغير
و طبعا بما ان الحكومه هى بابا و ماما فهى كمان بتعلمنا و الحكومه عملت عمر افتراضى للبنى آدمين
بمعنى ان الحكومه دلوقتى عملت نظام هايل للصحه اللى هو اييييييييييييه ؟
اللى هو العمر الافتراضى للانسان يعنى اييييييه برضو؟
يعنى تتعالج لحد مواعيد معينه و ليك يا مواطن مبلغ معين تتعالج بيه زودت عنه يا تدفع يا تغور فى داهيه و يبقى عمرك الافتراضى خلص
ده على اساس انك يا مواطن اساسا بتتعالج على نفقة الدولة و ان مفيش وزير بيزرع شعر فى امريكا بمبلغ و قدره و وزير تانى بينضف سنانه بتمن علاج 10 زيك فى امريكا برضو .. امال ايه .. انت عايز تربط حمارتك جنب حمارة العمده ؟ انت عمرك الافتراضى خلص نعملك ايه ؟؟؟؟؟
يا تدفع يا تتكل على الله تروح تدورلك على حفره تروح تندفن فيها .. انت عايز تقارن نفسك بالوزير اللى بيقابل اهم شخصيات فى العالم ؟ عايز سنانه يبقى لونها اصفر مطرح السيجار الكوبا اللى بتمنك اساسا ؟ انت اتجنينت يا مواطن ؟ انت عايز معالى الوزير يقابل حد من وزراء العالم يقوله سنانك بيضه انت عملها فين يقوم يقوله عند الدكتور عمر اللى فى اول فيصل ب 50 جنيه ؟ ده راجل رخيص شكلك عبيط يا مواطن
عمرك الافتراضى كده و ماما الحكومه هتيجى بالمنفضه لو فتحت بؤك و قولت علاج على نفقة الدولة
