بابا فين ؟!!!

- هى رجعت



- والله يا بابا ما انا شايف


- قوم بص عليها


- مش شايف حاجه


- يا ابنى بص كويس


- بصيت مش شايف


- طيب روح طل عليها كده شوفها هنا ولا هنا


- طيب شكلها ايه


- بيقولو مكسيه بالاخضر و البنى على شكل سلسله فى اليمين و الشمال


- لا مرجعتش


- يا واد بص كويس متخنقنيش دول بيقولوا رجعت لينا من سنين


- والله ما فى حاجه خضره خالص


- هاتلى النضاره


- اهيه يا بابا


- ايه ده ؟!


- مالك يا بابا


- دى هى .. بس شكلها مصفر كده ليه


- هى فين


- اهيه بص


- يا بابا دى مش تبعنا


- مش تبعنا ازاى مش دى خريطه مصر


- اه بس سينا كلها مش تبعنا مفهاش مصرين كتير


- ازاى دى كلها ارض مصرية ... انتوا بيعتوها ؟


- مش عارف بس اللى اعرفه ان مالهاش علاقة بالزراعه


- ازاى يابنى دى كلها أراضى استصلاح و صالحه للزراعه


- يا بابا سينا كلها صحرا وجبال


- يبقا اكيد بيستخرجوا منها الاحجار الكريمه


- احجار كريمه ايه بس يا بابا .... انت مش عارف اننا بنبيع للسياح احجار مغشوشه معموله فى الصين


- ايييييييييييييييييييييييييييييييييييييييييييه


- اه والله


- الصين؟! ... متصنعه فى الصين؟! .... يعنى عندنا كميه المناجم دى و بنجيب من الصين مغشوش


- ما اصل المغشوش ارخص


- ايه


- ارخص يا بابا


- الله الله يعنى بقالكوا سنين مبتعملوش حاجه غير انكم تستوردوا بضاعه من بره ؟


- لأ من الصييييين


- هى الصين بقت تبعنا ولا ايه ؟


- لا تقريبا احنا اللى بقينا تبعها ... لأننا تقريبا اهم عميل عندهم


- الصين ؟


- اه لحد ما الجنيه عام و غطس و مش عايز يقب و الحكومه بتقول ان فى اصلاح اقتصادى


- هو مش عبدالناصر عمل مصانع و بنا السد


- ايوه ايوه و السادات عمل الانفتاح الاقتصادى و دلوقتى بنبيع كل الحجات دى


- بتبيعوا ؟؟؟؟؟؟؟؟!!!!!!!!!!!!!!!!!


- اه اصل عندنا خساير كتير


- هو انتوا تخسروا تبيعوا ؟ مفيش اداره تتغير مفيش حتى اشارك واحد بيفهم و هو اللى يشغلها؟


- احنا فاضين ؟...


- و وراكم ايه؟!


- هاه؟؟؟؟؟؟؟؟؟


- و كمان مفيش حاجه تعملوها


- لا فى طبعا


- طيب قول يا ابنى


- يا بابا انت كنت كويس و عندك زهيمر زى الفل و مش فاكر حاجه ايه اللى فوقك عليا


- عارف سينا دى اول حجر اتحط فيها فى السياحه واحد مصرى كان بيحلم يخليها جنه بس الراجل ده كان عايش فى اسرائل


- ايوه رافت الهجان


- ماعلينا من الاسم هو اللى بنا اول مبانى فى شرم الشيخ و نويبع و طابا و دهب من اكتر من 30 سنه ..... كان بيحلم يخليها جنه و انتم ضيعتوا حلمه


- انتم مين و انا مالى


- مالك ازاى هى مش بلدك


- لا دى بلدهم هما احنا عايشين هنا بس و ملناش دعوه بغير كده


- حق انتفاع يعنى


- مش بالظبط لأن الانتفاع ده آخر حاجة ممكن نطولها لكن تقدر تقول كده برضو


- لا اله الا الله ... لا اله الا الله


- مالك يا بابا


- عليه العوض و منه العوض


- بابا


- يعنى انتم محدش فيكوا فكر يزرع ارض سينا


- ارض ايه يا بابا اللى نزرعها دى صحرا


- و هى المفروض تخضر لوحدها ؟!


- يا بابا الحكومه ما ادتناش فرصه نعمل حاجه اساسا


- يعنى الاراضى دى ما اتوزعتش على ولاد شهداء حرب اكتوبر ولا المقاتلين اللى ضحوا بحياتهم فيها ؟


- يا بابا علشان تشتغل فى جنوب سيناء لازم يبقى معاك اقامه


- اقامه فى بلدى ؟؟؟؟؟؟؟؟


- اه


- ازاى يا ابنى دى بلدى اعيش فى الحته اللى تعجبنى


- لالالالالا ده انت متفائل جدا


- فعلا سينا رجعت كاملة ليهم و احنا شغالين عندهم


- شوفت؟ آدى انت قلت اهوه


- بعد اذنك


- رايح فين يا بابا


- رايح نوبه زهيمر مش عايز اصحى منها عايز اخر حاجه افتكرها دم الناس اللى راح فى سينا زمايلى و دفعتى فى الجيش اخواتى و ولاد بلدى الرجاله


- طيب عايز حاجه من شرم يا بابا انا طالع اهيس يومين مع اصحابى و فى حفله جامده اخر حاجه فى الجبل ووووو ملهاش حل لشتروز الزنجبيل يعنى رقص ومليطه مع الأجانب للصبح


- حسبى الله ونعم الوكيل


- ماتقلقش يابابا هجيبلك معايا تاتوه من اللى بيطبع على الدراع

مكنتش اعرف

فى واحد كل ما يتكلم عن مصر يقولوله انت بره فى الامان كأن اللى هنا على خط النار و اللى انا اعرفه ان امن الدوله جهاز قوى جدا و على راسى من فوق بعد اللى حصل دا انا اشهد انهم بصراحه جامدين



لما يدوا تعليمات للكويت ترحل 18 مصرى .. و يترحلوا .. يبقوا جامدين ، المفروض دلوقتى بعد التطور اللى احنا شايفينه ده كليه الشرطه المصريه تبقى الاكادميه الدوليه يعنى اى ضابط شرطه عايز يتعلم ازاى يخلى المظاهرة تتلاشى لازم ياخد درس خصوصى من الناس اللى كانت فى الشارع يوم 6 ابريل دول خلوا المظاهره فاضيه يا ناس .. ده اسمه احتراف دول دلوقتى ممكن نأجرهم لقمع المظاهرات بره علشان نزود مصادر الدخل القومى و الناس الحلوه بتوع امن الدوله ربنا يجعل كلامنا خفيف عليهم .. ولا مش خفييف يعنى هما بيسيبو حد فى حاله دا انا سمعت انهم عندهم صور لبعض الامراء الكويته اللى خايفين من الفضيحه و اى حاجه يطلبوها بتتعمل بسبب الصور دى بصراحه معلمين


دول فعلا اللى يعرفو عن الواحد اكتر من نفسه


ايه ده


انت مين يا عم


- قوم


- مين


- قوم


- انت دخلت بيتنا ازاى


- قوم


طيب ها استأذنكوا بقى اصلهم عايزنّى شويه .. مش قولتلكوا يعرفو عن الواحد اكتر من نفسه ....... بس ربنا يستر و ما اطلعش انا اللى قتلت جون كيندى اللى اتقتل قبل ما اتولد اصلا

و انا وزير

قاعد فى البلكونه ساعة العصارى  طقت فى دماغى ابقى وزير السياحه فى الحكومه اللى بعد اللى جايه علشان تبقى بعيد و محدش يخاف على منصبه منى

المهم  قلت فى بالى هبقى وزير السياحه و ها ابنى كزا و ها اعمل كزا و هسوّق للسياحه فى مصر علشان اساعد وزارة القوى العامشة فى توفير فرص العمل للشباب اللى قاعد على القهوه ، و فجأه نط فى دماغى حوار كنت سمعته فى التلفزيون عن معالى الوزير حامل مفاتيح خزائن مصر  لما  دخل اجتماع لرفع سعر القمح طلع بسعر للبنجر يعنى لو قلتله زى ما وزير السياحه الاسبانى قال ادونى فلوس و خمس سنين و اخلى البلد دخلها يتنمّى و قلتله هبنى فندق هترسى على عشه ده لو اتبنت اصلا

طيب و بعدين اعمل ايه  قررت الاتى

انى لازم ابقى رئيس الوزراء علشان

·     اول حاجه ما احطهوش فى التشكيل الوزارى اساسا

·     تانى حاجه ما اشفش موبيل فى ايد وزير لا جوه المجلس ولا فى اجتماع

·     تالت حاجه اى وزير هيشحت على الشعب و مش هيقسم معايا ها انفخه

انفخه ؟ ... مش الفاظ وزير برضك ، بس لسه شويه على الوزارة ، و الله اعلم بعد اللى انا كاتبه ده ممكن ابقى وزير ولا مش ها الحق حتى ابقى مواطن

ما علينا

غطينى و صوتى يا صفيه

كنت قاعد من كام يوم باتفرج على التلفزيون انا و الزعيم الراحل  سعد زغلول، و كان فيه شخصيه سياسيه مرموقه بتتكلم عن الرئيس مبارك و الراجل قال كلام زى الفل فى حق الريس و قال انه مش متقدم صح للشعب المصرى و ان الشعب مايعرفش هو بيخاف على مصلحته قد ايه و الوزراء اللى حوليه هما السبب لانهم بيبينوا له شغلهم عن طريق المنح اللى بيجبيوها من بره

لقيت سعد باشا بيقول غطينى و صوتى يا صفيه غطينى و صوتى يا صفيه 

قولتله تانى يا باشا ؟! ما احنا خلصنا من الاحتلال من زمان

قال غطينى و صوتى يا صفيه  بيشحتوا على شعب مصر

قولتله ما احنا دوله ناميه رد عليا و هو راسه فى السماء و بتاخدوا المنح دى من مين

قولتله هو الاساسى المعونه الامريكيه

لقيته بيلطم مابقيتش عارف اقوله ايه بس سألته مالك يا باشا

قالى امريكا ؟ ...  هى عمرها كام سنه امريكا دى

طيب قولى الدولار بكام  قلتله بخمسه .. قالى إيه ؟

قولتله  بخمسه جنيه و نص

الراجل الله يرحمو كان ها يموت تانى

و لقيت سعد باشا الارستوقراطى ابتدا يردح و يقولى هو ايه اللى بخمسه ونص يا عنيا

ده الخمسه منه  بجنيه

انا بقيت مزبهل يا عم ده وصل فى مره 7 جنيه و ربع

غطينى و صوتى يا صفيه الدولار بخمسه جنيه ونص

ايه يا باشا هو كل حاجه صفيه تغطيك و تصوت

انتم ضيعتوا البلد دى كانت محتله و الشيخ سيد بيقول ده خير بلدنا ماهوش فى ايدنا

انا فكرت قولت اقفل التلفيزون احسن ما يشوف خبر عن اللحمه او عن انابيب البوتاجاز يولع فى نفسه وهو قاعد ولا حاجه و هى مش ناقصه بلاوى تيتحدف على الواحد

- و الناس عاملة ايه

- بخير والله يا باشا

- يعنى عاجبهم الحال

- لا طبعا

- و مين الزعيم

- انا رديت بتلقائيه عادل امام

قالى مين؟ ..  قولتله زعيم السينما عادل امام احسن ممثل كوميدى فى مصر

انا لقيت وشه احمر و كان هيطبق فى زماره رقبتى

- فى ايه يا باشا

- اقلك مين زعيم الامه تقلى زعيم التمثيل ؟!!

- اعزر جهلى يا باشا احنا ماعندناش زعيم غيره

- طيب و المجلس الموقر مين اعضائه

- دول 400 يا باشا

- مين اللى ماسك دايرتك ؟

حسيت انه فهم جهلى بالنائب عن الدايره اللى انا منها لما سكت

- متعرفهوش برضو ؟

- اصلهم ما بنشفهمش غير ايام الانخابات يا باشا

- ايه ؟!

- اه والله ............. ايه مالك يا باشا

- غطينى و صوتى يا صفيه

و توجه الزعيم الى البلكونه قولتله رايح فين يا باشا ؟

فضل يقول : مافيش فايده .. مافيش فايدة

-         هتعمل ايه يا باشا

-         مافيش فايدة .. مافيش فايدة ... (وراح رامى نفسه وهو بيقول)

غطينى وصوتى يا صفياااااااااااااااااااااااااااااااه