برلمان الثورة

عزيزى القارئ احب اقولك كلامى ممكن  مايعجبكش و ساعتها هتقولى انت ضد اراده الشعب عادى جدا احب انا اقولك هع لما نزلنا 25 يناير كنا ضد اراده الشعب من الاخر هذا البرلمان لا يمثلنى ولا يلزمنى ببصله ولا حتى قشره البصله البرلمان اللى جاى بدل ما يجيب حق الشهداء عايز يعلمنا الادب و يقفل المواقع الاباحيه طيب والنبى اتلهى .. ايه ؟ قفشت ابنك بيتفرج على شكس و مش عارف تسيطر عليه .. فبتربى الشعب كله ؟ قبل ما تركز فى المواقع الاباحيه اتكلم فى حق اللى ماتوا علشان انت تترزى على كرسى برلمان و تبقى نايب او نايبه بس واضح ان النايبه تقيله .. البرلمان اللى اتهمنا و احنا بندافع عن نفسنا فى تظاهر سلمى اننا بناخد فلوس و بنضرب ترامادول لا يمثلنى انا ماحاربتش امثال عكاشه علشان يبقى فى 400 عكاشه فى البرلمان .. البرلمان اللى بيعمل لجنه تنبثق عنها لجنه علشان تكون لجنه تكون مهمتها عمل لجنه انا نسيت اصلا الموضوع اللى هما هيحققوا فيه ؟ اه حادث بورسعيد اللى كلنا عارفين انه حادث تصفيه بحت ده برلمان فشنك

البرلمان اللى سايب الحمار و بيتشطر على البردعه لا يمثلنى برلمان خيش و قش البرلمان اللى بيعمل استجواب لوزير الداخليه علشان وقف ضابط ربى دقنه ( تربيه الذقن فى العسكريه ضد العقيده القتاليه لانها نقطه ضعف لأنه ممكن يتملك منها أثناء القتال) و ماعملش للوزير استجواب بسبب الانفلات الامنى المتعمد لا يمثلنى

البرلمان اللى لما واحد فيه اتهم البردعى بالعماله رفض يجيب حق مواطن مصرى تم اتهامه بالعماله بدون بينه و فى نفس الوقت بيحاسب عضو من اعضائه دخل وسطيهم غلط لانه قال اللى مش قادر على الحمار اتشطر على البردعه لا يمثلنى

البرلمان اللى بيتكلم عن عمل لجنه هاكرز علشان تقفل المواقع الاباحيه و على الصبح الفيس بوك اهه و سايب الحد الاقصى و الادنى و الصناديق الخاصه و المزانيه لا يمثلنى  

و اخيرا و ليس اخرا البرلمان اللى لا يمثل اطياف الشعب كله و بيتخانقوا مع بعض فى الجلسات زى العيال الصغيره فى الحضانه لا يمثلنى و حضرتك سميها زى ما تسميها ضد اراده الشعب ضد التيار ضد اى حاجه بس مش ضد الدين علشان ده اللى بيتقال عادةً انا ضد التغيب و ضد الهبل انا ضد ان واحد يطلع يقولى انا هحترم اتفاقيه السلام و يتكلم فى المواقع السكس و سايب الناس بتعيط بسبب انبوبه البتجاز ضد اللى سايب منجم السكرى و جبل الدهب يتنهبوا ضد اللى بيستهبلنى و فكرنى مش شايفه

لأ شايفك و ضد هذا البرلمان ... لا يمثلنى باى شكل من الاشكال 

رومانيا على الطريقه الطنطاويه

من شهر تقريبا كنت بتكلم مع صديق و بيقولى انا خايف من سيناريو رومانيا و دار الحديث كده بالظبط

-          انا خايف من سينريو رومانيا يحصل معنا 25 يناير

-          هو صعب بس ممكن

-          ممكن ازاى تفتكر الاخوان و السلفين

-          لا , اللى خلانا كل ما نمسك حد من المواطنين الشرفاء من اول يوم نزلنا فيه الشارع لازم نلاقى فيهم عساكر دخليه او امناء او غيره ( 18 يوم و العبسيه و كل الاعتصامات ) يخلينا نحط فرض انهم ممكن يستخدموا الجيش كا مليشيه مسلحه لانهم لو حطو سلاح فى ايد اى حد ميضمنوش السلاح يلف و يضرب فيهم

-          يعنى ؟

-          يعنى هنستنا اى اخبار تيجى من الجيش ان بعض الوحدات المتطرفه مش بتنزل اجازات من يناير و ده علشان يشحنوهم نفسيا ضد الثوار و يبقو هما دول عمال المناجم

الاهم من الحديث اللى دار الكلام اللى وصل الى الاستاذ كمال خليل اللى فى ناس شككت فيه

الاول ها ارد على التشكيك , العسكرى اللى اتكلم معاه يعرفه معرفه شخصيه و نفسه ينبهه بس خايف و ده واضح من سياق الحوار اللى دار بينهم هو يعرفه مسبقا و لما اتقابلوا استاذ كمال هو اللى سأله يعنى العسكرى ما راحش اتكفى على وشه قصاده و قاله انا ها اعترفلك الفكره كلها ان حتى العساكر اللى حجزوهم الفتره دى كلها علشان ينعزلوا و يعملوا  ليهم غسيل مخ فى ناس هما يعرفوهم بالفعل و يعرفوا هما قد ايه ناس محترمه ( الجندى سبع الليل كان عارف مين اللى علمه حب مصر )

ازاى ها تتلعب ؟؟؟

اولا : الامان  

ثانيا : البنزين و الغاز و فى اخبار عن ان نص القاهره هيتقطع عنها المياه

ثالثا : فرقه وحده من الجيش تربى دقنها و تنزل مسلحه اى كان شكل التسليح تهاجم الاحتفاليه (عصفورين بحجر)

اول حاجه هتحصل وقيعه بين اللى فى الميدان اللى مش مربى دقنه و اى دقن معديه فى الشارع يعنى بوادر حرب اهليه بتدخل فيها الجيش بالصوره اللى تعجبه يموت يحرق يولع عاطف هيبقى مبصوت جدا و هيتكيف على الاخر لانه شايف حرب بين مصرين و مصرين و نرجع تانى للفزاعه (اى حد بدقن ) بعد ما يسيبو فرقه الجيش تصفى اللى تصفيه و تقوم حاله من الزعر و الفزع بين المصرين و يبقى قسمهم فرقتين فرقه بدقن و فرقه من غير دقن هيقدر يلم اللى هو عيزه فى السجون و يصفى اللى هو عايز يصفيه و المواطن الكنباوى (عاطف ) هيبقى مبسوط و يصقفلهم كمان لانه خايف على نفسه من الدقون و لان فى الفتره دى هيبقى فى اشاعات ان اسرائيل على الحدود ده ف حرب اهليه يا اخونا فى البلد فا اللى هيطالب بقتل ميدان التحرير هيكون كل واحد فى بيته و لان الظاهر قصاد الناس اللى فى البيوت الدوقن و الثوار اللى بتنزلوا تموتوا الناس فى الشارع و بنظريه امانك ولا حياه اللى فى الشارع المواطن الكنباوى هيغمض عينه براحته عن تصفى الثوارو المجلس براحته من غير اى اعتراض و هيرجع الاسلاميين السجون تانى  لا مش كده و بس

لان الجيش بقياده طنطاوى هو اللى هيقدر يسيطر على الحرب الاهليه اللى البلد هتبقى دخله عليها هتطلع اصوات تطلب من طنطاوى انه يبقى رئيس انتقالى و هياخد اول دورتين و يبقى طبق سيناريو رومنيا من غير استخدام مدنيين اصلا و بيقو ضامنين على الاقل نسبه 80% ولاء اللى نازل يضرب فى المتظاهرين

 هو ليه وقف البنزين و المياه و الغاز ؟

علشان يثير غضب العامه و فى نفس الوقت البلد هتقف بجد شلل تام من اول يوم 25

لو اقتنعت بالكلام الفارغ اللى انا بقوله او حتى خلاك تشك يبقى دى وجهه نظر سليمه بنسبه 70% و دى نسبه كبيره و لازم نكون حذرين جدا جدا جدا

يسقط يسقط حكم العسكر 

التعلب المكار و حرس الغابه

يحكى ان كان فى غابه على فكره غير الغابه بتاعه  علاء الاسوانى  علشان العسكر بيلغوا اى حاجه هو طالع فيها انا مالى يا عم احنا خلينا فى الغابه التانيه  اللى جنبها و شوف يا مؤمن حكمه ربنا الغابتين جنب بعض و الاتنين حصل فيهم ثورات وشوف برضوا يا مؤمن حكمه ربك الاتنين لبسوا برضو فى الجيش بس فى وحده فيهم فيها امل

و انا طبعا مش ها اقول انا بحكى عن انهى غابه اصلها مش محتاجه زكاء يعنى ركز معايا بس و انا اقولك يا سيدى الفاضل و انت تعرف

دلوقتى الى حصل فى الغابه بتاعتنا اللى هى غابه سعيده بحكم اخونا اياهم يا رب ما تجعل كلامنا خفيف عليهم

لما الملك اتزنق جاب صديق عمره و قاله يا صديق ايه الحل قاله اوعى تخاف الصديق وقت الضيق يا برنس قاله و ده العشم برضو

طيب نعمل ايه ؟؟؟

قاله هات الاقرع اللى انت عينته نايب ليك يقولنا ده تعلب الغابه و اكيد هيجيب من الاخر فى الحوار ده راح صاحبنا الملك ما كدبش خبر و بعت الاخ الحارس بتاع الغابه يجيب التعلب و قعدوا هما التلاته يتفرجوا على التلفزيون و يشوفوا الثوره

الملك : و بعدين يا تعلب

التعلب: ولا قبلين سهله جدا

الملك (و هو حاسس انه بيشتغله) : ازاى ؟

التعلب : هما دلوقتى  زى كوره تلج نحسسهم انهم كسبوا كوره التلج .. كوره التلج ها تتكسر

الملك : و بعدين ؟؟؟

التعلب : نلعب براحتنا و نجيب اخونا الحارس يقول انه ها يعمل انتخابات

الملك (و هو ابتدى يركز) : و بعدين  ؟؟

التعلب : الانتخابات هتخليهم يتنافسوا فا يرجعوا فرق كتير كل فرقة بتدور على مصلحتها

الملك : ها

التعلب : هيحصل تفتيت و فى نفس الوقت هيبقى فى تيارين اقوياء ها يقلبوها حرب

الملك : يا انا يا الفوضى يعنى ؟؟

التعلب : التيار الدينى هيبقى عايز يدخل مجلس الغابه علشان يعمل دستور جديد دينى و التيار التانى ها نستغل انه لسه دافع دم قلبه فى الانتخابات اللى فاتت

الملك : ازاى ؟

التعلب : تيار الفلول جنابك عايز يرجع باى شكل علشان يعوض الخساره و التيار الدينى عايز يسيطر باى شكل على الحكم ها يعملوا فوضى و هيبقى فى ضرب نار و ناس هتموت نقوم نلغى الانتخابات

الملك : و كسبنا ايه

التعلب : فى الوقت ده من رعب الناس لو عملنا استفتاء على عودتك للحكم الناس ها تطالب برجوعك او على اقل تقدير ممكن نعمل حاجه شبه اللى البنى ادمين عملوها فى 54 فى مصر انقلاب بس بتايد الشعب  الفوضى ها تخلى الشعب لو تم استفتائه على اى حد من مجلس الغابه ها يوافق دغرى علشان الامان و نبقى امنا جنابك و فى نفس الوقت قدرنا نفلت

، و اهو اللى مسك الحكم .. واحد مننا

الملك : يا ابن التييييييت ليهم حق يسموك التعلب

التعلب : تؤمر جنابك

الملك : نفذ يا حارس 

فشنك يا بوب فشنك

بتكدب ليه هه ؟ قولى بتكدب ليه ؟

عارف اللى بيكدب بيكدب علشان عارف انه غلطان . قولى يا جناب اللواء هو انت عايز تقنعنى ان فى حاله الانفلات الامنى اللى انتوا فلقتونا بيها دى  وحده الجيش اللى قصاد مبنى التلفزيون وقفه تامن  اهم جهاز اكاذيب فى الدوله بسلاح صوت ده على اساس ا ندى وحده اطفال فا انتوا بدل الزخيره موزعين عليهم بنب يفرقعوه طيب بلاش دى هما مش جوه مدرعه ولا دى كمان فشنك و العسكرى اللى سايق ده مش عارف انه فى مدرعه طيب ده سمع صوت طوب على المدرعه اتفزع امال لو نزل جنبه دانه مدفع هيعمل ايه ؟؟؟

هيبل البنطلون ؟

طيب هل ده يؤتمن على قياده مركبه عسكريه فيها 8 افراد فى حرب ؟؟؟

طيب فى سؤال تانى مش فى كاميرتين متثبتين على المبنى وبيصوروا كل حاجه 24 ساعه ؟؟ فين المعركه الضاريه اللى بالطوب من اولها مش متسجله ولا دى هنلاقى عليها الواد محروس بتاع المشير  (عفواً) بتاع الوزير .

طيب انا موافق ان السلاح فيه محشى مش رصاص و ا نفى عسكرى بيقود مركبه عسكريه ممكن يتحرك من غير اوامر القائد بتاعه اللى هو ضابط لو اتخض و بل البنطلون من شويه طوب يبقا احنا مسندين على حيطه ميله .

المدرعه لما اتحركت طلع منها ناس تضرب الرصاص الفشنك .

المتظاهرين ماتوا ازاى برصاص حى كان معاهم رصاص و هما قرقشوه موتهم ؟؟؟

شوف يا عاطف انا وراك لحد ما تسترجل و تبطل تروح عند المواسير يا بن الدزمه

طيب بلااااااااااااااااااش كل ده

مش الجيش صرح انه عنده حالات استشهاد ؟؟؟ هما مش مصرين ؟؟؟ فين اساميهم ؟؟؟ قولتوا علشان البلبله  ... صح ؟؟؟

طيب ما احنا عرفنا خلاص ا ن فى شهداء هيفيد با ايه بقى انك تخبى ؟؟؟

انا عن نفسى عايز اعرف اساميهم علشان اكرمهم هما مش مصرين يا ناس

عايز اواسى اهلهم و اخد بخاطرهم هما مش ليهم حق فى التكريم ولا علشان عساكر ؟؟؟

العسكرى بيتحرك حسب الاوامر مش برحتهم كده و انا مبحبش حد يشتغلنى قولوا الحق

قولوا مثلا احنا كنا عيزين نفض الاعتصام و التلفزيون حرض الاهالى على كده و احنا اتلككنا مع العلم ان التلفزيون بيتحرك باوامر من الشؤن المعنويه يعنى حتى التحريض جى من المجلس السمكرى.

مش عيزين تمشوا عدل ابدا  ؟؟؟؟

طيب اللى عملها مره يعملها التنيا ولا اف 16 ولا مدرعات هتنفع يا ريت  تفوقوا و تعرفوا اننا صحين و مش مغيبين يسقط يسقط كدب العسكر 

استرجل و بطل تروح عند الموسير

انا مش قادر اصدق ان لسه فى ناس بالسزاجه دى  مش قادر اصدق ا ن فى ناس بتدور على مبرر للمدرعات اللى دهست الناس انها تدهسهم مش مصدق ان فى واحد عنده استعداد يصدق ان الاقباط كان معاهم سلاح مع العلم انى متاكد ان على الاقل نص المظاهرات امبارح كانت مسلمين مش قادر اصدق انه بيقنع نفسه بالكلام ده

طيب خلينا نتكلم بالعقل يمكن عاطف يسترجل و يبطل يروح عند المواسير لو واحد معاه سلاح اللى السلاح الالى خزنته فيها 30 طلقه فى كام واحد من الجيش مات ؟؟؟ مع العلم ان لو اتضربت رصاصه تاخد اتنين ورا بعض و يمكن ازيد.

كلنا شفنا مصابين من الجيش لكن هل حد شاف حد مات ؟؟؟

انا شفت جثث بالكوم كلها مدنيين فين جثث العسكريين اللى بتثبت ان المظاهره ما كانتش سلميه  ؟؟؟؟

اللى بيقولوا البلد هتضيع احب اقولكوا انتوا هتضيعوا دمنا اللى سال فى ارض ميادين مصر علشان نبقى احرار هدر

اسال نفسك كام سؤال الاول و بعدين نكمل كلام

-         لما طلع فى قناصه فى الدخليه معالى الوزير لسه فى مكانه ليه ؟؟؟

-         لما يبقى فى قانون اسمه قانون حظر الاعتصامات يطلع فى 24 ساعه و قانون دور العباده يفضل 6 شهور علشان يتعمل ده اسمه ايه ؟

-         لما كلنا نبقى عارفين ولا يخفى على احد البلاوى اللى بتحصل فى منجم السكرى يبقى ده ايه ؟

-         بلاش كل ده .. ده ملهوش دخل فى الفتنه اللى حصلت , سالت نفسك فى ايام الاعتصام كان فى 18 يوم ا ازيد شويه مفيش واحد بدبوره على كتفه كان بيعدى فى الشارع و مصر كلها كانت شيله سلاح السلاح اللى كانوا بيقولوا عليه مطلعش من الكنايس ليه ؟؟؟؟

-         طيب الفتنه اللى حصلت فى حلوان مش طلع فى الاخر اللى مولعها امين شرطه من امن الدوله و اللى بيحركه ضابط من امن الدوله ولا انا بهزى ؟

-         بلاش كل ده علشان انا من كفار بنى مُرَّه .. هل من المنطقى ان مظاهره فيها سلاح بيتضرب على الجيش يموت فيها 55 مدنى و 3 زى ما قالوا و مشفناش عسكريين ؟؟؟

-         بلاش كل ده مين فينا يختلف على عمر طاهر انه راجل محترم ؟؟؟ بشهاده عمر طاهرنقلها عن صديقه المخرج كان قصاد التلفزيون قبل الاشتباكات و رديوا العربيه بيذيع ان فى اشتباكات قصاد التلفزيون و فى مدرعه ولعت ده اسمه ايه ؟؟؟

-         اسالتى سخيفه ؟؟؟ بتشغل المخ صح ؟؟ طيب معلش خليك معايا لحد الاخر و اصبر و نحسبها سوا

-         مين اللى ضرب كنيسه القديسين ؟؟؟

-         هل النظام اتغير ولا اللى فى الحكم دلوقتى كانوا موجودين ايام مبارك ؟؟؟

-         لما المشير طلع قال احنا ما اخدناش اوامر بضر المتظاهرين امال الجيش قام بحمايه الثوره من ايه ؟؟؟

-         هو انا عيل سو ؟؟؟ والله ابدا بس اصبر عليا

-         طيب لما التلفزيون المصرى اللى فى احداث الثوره كان بيذيع لكى يا سيدتى دلوقتى يعمل فيها شريف ده منطقى  ؟؟؟ مع العلم من كام يوم عمر طاهر و بلال فضل و نجلاء بدير و دول كتاب اكتر من محترمين يمتنعوا عن الكتابه اعتراض منهم على مراقبه الجيش لكل ما هو مكتوب المفروض انى اصدق ان اللى بيتذاع ده حقيقى ؟؟؟

طيب كفايه كده اساله لانك لو ما ابتديتش تحس ان فى حاجه غلط يبقى انت عندك مشكله بس سؤال واحد كمان

ايه الهدف ؟؟؟

مجربتش تفرض ابدا الفرض التانى ان الشرطه العسكريه هى اللى بتضرب (مع العلم ده مش الجيش كامل ده زراع المجلس فى البلد)  طيب و بقيه الجيش ؟؟؟ اكيد على الحدود الشرقيه حدودنا مع اسرائيل  صح ؟؟؟

احب اعملك مفجأه و اقولك ان الحدود الشرقه اللى هى حدودنا مع اسرائل لا يحميها الجيش و لكن تحميها وحدات خاصه من الامن المركزى !!!!

طيب و انسحاب الشرطه ؟؟

ها احكيلك يوم 29 بعد عوده الاتصلات و لانى عشت فى جنوب سيناء كتير كنت مرعوب و ضغطى كان عالى لو دول انسحبوا يبقى اسرائيل فى سيناء المفجأه انى اتصلت بواحد صديق من قوات التامين دى و كان نص الكلام كده (الكلام ده مش من بيتنا ده ناصص عليه اتفاقيه كانب ديفد ).

-         ازيك يا ... انت فين

-         انا على الحدود

-         يعنى ما انسحبتوش

-         ننسحب مين انت اتجننت شيدوا حيلكوا انتوا بس و بلغ كل اللى عندك ان اسود مصر واقفين على الحدود فى ضهركوا و انتوا كملوا على هامان و جنوده ربنا ينصركم

-         امال ايه انسحاب الشرطه من سيناء دى

-         تفتكر انتوا بتموتوا علشان نبقى احرار و احنا هنسيب ضهركوا للصهينه

-         تسلموا و بلغل سلام كل اللى فى التحرير لقوات تامين سيناء

-         انت بلغ لكل اللى فى الميادين اننا فى ضهركوا و ربنا معنا و معاكوا

و سلمنا على بعض و قفلنا الخط على فكره ده حصل فى الحدود الجنوبيه كمان يعنى اسسا مفيش خوف على مصر من احتلال و الهبل ده بس دى الفزاعه

الفزااااااااااااااااااااااااعه

امريكا ها تيجى تحتل مصر علشان تحمى الاقليات الله يخرب بيوتكوا

كام مره سمعتها لو مسمعتهاش يبقى انت مش من الثوار اسسا و المفروض بعد الجمله الهبل هدى نعيط و ندبدب فى الارض و نقول خلاص اللى حصل حصل و نحط فى بقنا بلغه و نقبل نعمل استفتاء على المشير انه يبقى رئيس المرحله القادمه و كانك يا ابو زيد ما غزيت و اللى ماتوا ماتوا هدر و اللى حصل ده كله كأنه ما حصلش  يا ريت نفوق لاننا احنا اللى هنضيع بعض مش حد تانى 

30 سنه عدل !!!!

فعلا 30 سنه عدل  انا مش بهرج كانوا 30 سنه عدل بس لحظه مش هما هما نفس ال 30 سنه اللى فى بالك ال30 سنه اللى انا بتكلم عليهم هما عمر العدل فى الخلافه الاسلاميه 30 سنه بس مش اكتر من كده

30 سنه ؟؟؟!!!

أه 30 سنه هى مجموع حكم الخلافاء الراشدين معلش اصل التاريخ مبيكدبش  بعد كده بقت مملكه او اماره و تحولت من الدوله الاسلاميه اللى اسست الديموقراطيه الى الاماره اللى اتفككت على ايد الاستعمار (بدايتها كانت الحكم الاموى و لم يتخللها عدل الا فى عهد عمر ابن عبد العزيز )

ازاى يعنى اسلاميه هى الديموقراطيه ؟؟؟

اقولك ازاى مش فى نص بيقول و امرهم شورى بينهم ؟؟؟؟

هو ده اسلام ولا لا ؟؟ هو ده برضوا الاساس فى الدوله الديموقراطيه و اللى اسسها يا مؤمن هو سيدنا محمد
(صلى الله عليه و سلم )

ازاى ؟؟؟

لما يجى سيدنا محمد يقول للمسلمين يا مسلمين اختاروا واحد من دول يكون خليفه المسلمين دى شورى و ديموقراطيه ولا لا ؟؟؟

يبقى نحكم عقلنا لان مفيش نص اسمه ديموقراطيه  لكن فى حاجه اسمها طريقه ديموقراطيه

اللهم أوصل الدين الى اهل السياسه ولا تصل اهل الدين للسياسه ( دعاء للشيخ الشعراوى رحمه الله عليه)

ممنوع الانتظار

عفوا ممنوع الانتظار

الحاله اللى احنا فيها الانتظار مش مجرد مخالفه ده خيانه خيانه بلد خيانه دم ولاد البلد خيانه ثوره مات فيها كتير و اتصاب فيها اكتر هى دى الخيانه خيانه ضميرك خداعه الجرى ورا الاضواء محاولة الوصول باى طريقه

فين الثوره هى دى الثوره ؟؟؟؟

فين حق اللى ماتوا ؟

فين علاج اللى اتصابوا ؟

فين تحديد مستوى الاجور حد ادنى و حد اقصى ليها ؟

عفوا ايه المجلس انا لم اعد اثق فيك ولا اثق فى قراراتك و اطالب بعزلك عن منصبك الموازى لمنصب رئيس الجمهوريه اذا لم يحاكم مبارك و اسرته

هو احنا علشان عملنا ثوره بيضاء يبقى مبارك يتم التحقيق معاه مدنى ؟؟؟؟؟؟؟

يعنى ايه رئيس مخلوع يتحاكم مدنى ؟؟؟؟؟؟؟؟؟؟

امال اتخلع ازاى هو و عيلته ؟؟؟؟؟؟؟؟؟

هى مش ثوره ولا ثوره الا ربع ؟؟؟؟؟؟؟؟؟؟

ما لو كانت دوله ديمقراطيه فى عهده كانت الدنيا بقت زى الفل ولا احتجنا ثوره ولا احتاجنا خلعه بمعنى اخر فى فساد فى كل حته بسببه و اهمها فى اخطر جهاز فى مصر اللى هو القضاء يقوم ابنك انت يضحك عليا انا و يبعلى البتاعه دى و يقولى بتقشر بطاطس بطاطس مين يا عم مخلوع لسبب الفساد ولا لا ؟؟؟؟؟؟؟؟

والفساد ده خروج عن الدستور اللي اقسم على احترامه يعني البيه متهم بالخيانه العظمى ليه ما تمش اعدامه رميا بالرصاص ؟؟؟؟؟

بلاش الدستور عشان بيعمل ارتكاريا اليومين دول هو امره بقتل المتظاهرين العزل مش خيانه عظمى ؟؟؟؟

ثم تعلا هنا يعنى ايه شباب بيتظاهر سلمى بعد قياااااااااااام ثوره يتم محكمته عسكريا ؟؟؟؟ والفاسد القاتل مبارك يتحاكم مدنيا ؟؟؟؟؟

يعنى ايه هه حد يرد عليا ثوره ولا ثوره الا ربع علشان انا مرارتى مش مستحمله يعنى ايه اللى ماتوا يفضلوا كده يقولوا لينا كلنا لكل ال20مليون اللى نزلوا فى مصر كلها انتوا خونه و سايبين دمنا يعنى ايه خالد سعيد يعدى على موته سنه و لسه مصدرش حكم فى قضيه قتله اساسا يعنى ايه كل ده يحصل، ها بقى دي ثوره ولا ثوره الا ربع ؟؟؟؟؟؟؟؟؟؟؟

عفوا سيدى اذا كانت عجله الانتاج هتقف تقف بس ممنوع اى انتظار من اى نوع فى دم المواطن دم شهداء أولا محاكمه الخونه و اولهم مبارك أولا ؟

عفوا سيدى ممنوع الانتظار عجله الانتاج تقف فى اى جنب و عجله الثوره تدور تانى